Ecclesiastes 1
Buk
Eklesiastes
O, Man Bilong Autim Tok
1¶ Ol toktok bilong Man bilong autim tok, pikinini man bilong Devit, king long Jerusalem. 2Samting nating bilong ol samting nating, Man bilong autim tok i tok, samting nating bilong ol samting nating. Olgeta samting em i samting nating. 3Man i winim wanem samting long olgeta dispela hatwok bilong em em i kisim aninit long san? 4¶ Wanpela lain tumbuna i pinis i go, na narapela lain tumbuna i kam, tasol dispela graun i stap oltaim oltaim. 5San tu i kamap, na san i go daun, na em i go hariap long ples bilong em we em i kirap. 6Win i go long hap saut, na tanim nabaut i go long hap not. Em i tanim nabaut oltaim, na win i kam bek gen bilong bihainim ol raun bilong em. 7Olgeta riva i ran i go long biksi, tasol biksi em i no pulap. Long wanem ples we ol riva i kam long en, long dispela hap ol i go bek gen. 8Olgeta samting i pulap long hatwok. Man i no inap kolim dispela. Ai i no ting em inap tru long pasin bilong lukim, o ia i no pulap long pasin bilong harim. 9¶ Samting i bin stap bipo, em dispela samting bai stap bihain. Na dispela samting ol i bin mekim pinis em dispela samting ol bai mekim bihain. Na i no gat wanpela nupela samting aninit long san. 10Ating i gat wanpela samting we ol i ken tok long en olsem, Lukim, dispela em i nupela? Dispela i bin stap pinis long taim bipo, dispela i stap pastaim long yumi. 11I no gat pasin bilong holim tingting long ol samting bilong bipo i stap. Na tu bai i no gat pasin bilong holim tingting liklik long ol dispela samting i kam wantaim ol dispela husat bai kamap bihain. 12¶ Mi, Man bilong autim tok, i stap king long bosim Israel long Jerusalem. 13Na mi givim bel bilong mi bilong painim na painimaut tru wantaim save tru long sait bilong olgeta samting, dispela ol i mekim aninit long heven. Dispela hatwok wantaim pen i strong tru God i bin givim long ol pikinini man bilong man bilong hatwok long en. 14Mi bin lukim olgeta wok, dispela ol i mekim aninit long san. Na, lukim, olgeta em i samting nating na samting bilong givim hevi long spirit. 15Dispela samting i krungut pinis, ol i no inap mekim i kamap stretpela. Na dispela samting i sot ol i no inap kaunim. 16Mi stori wantaim bel bilong mi yet, i spik, Harim, mi kamap man i gat sindaun i gat bikpela namba, na mi bin kisim save tru moa long olgeta husat i bin stap bipo long mi long Jerusalem. Yes, bel bilong mi i bin kisim bikpela skul bilong laip long save tru na save. 17Na mi givim bel bilong mi bilong save long save tru, na bilong save long tingting i longlong na longlong pasin. Mi kisim save long dispela tu em i samting bilong givim hevi long spirit. 18Long wanem, long planti save tru planti bel sori i stap. Na em husat i mekim save i kamap planti moa i mekim bel i pilim hevi i kamap planti moa.
Copyright information for
TpiKJPB